قارقا و بلبلین مکالمه سی
قارقا بیر گون ایدردی گلشنی سیئر گوردی بیر بلبلی قفسده اسیر
اوزینی هی ورور اویان بویانا بلکه آزاده پر چالوب دولانا
بوشلیوب استراحتی چابالور ایشیگین عطرینی قفسدن آلور
باخوری سیملرین آراسندان گلوری شوره دل یاراسندان
قارقا عرض ایتدی ای پرنده عشق ای اولان شاه عشقه بنده عشق
ندی تقصیرون ای وفا کانی سنی ارباب ایدوبدی زندانی
بو نظافت بو سس بو نطق و بیان سنه جانا روا دگول زندان
دیدی بلبل که ای پرنده شوم اولیندن بله الوب مرسوم
قالا زنداندا عندلیب و هزار اولا آزاد کرکس و لشخوار
سنکی سرقتده اولموسان مشهور قارقاروندان جهانیان منفور
چورگی دستمالیلا جازلورسان صابونی تاخجادان آلازلورسان
پنیری سفره دن وروب قاچوسان گردکان گورجگین قاپوب اوچوسان
شانسووا چیخسا پاک یا نا پاک داراشورسان که سند یوخ امساک
طینتون پست و نیتون میشوم مسلکون مذهبون دگول معلوم
سنی آزاد ایدوب بو چرخ دنی قفس غمده ساخلیوبدی منی
دوتولان دیللره صفادی دیلیم لیک اوز باشمه بلا دی دیلیم
گجه گوندوز اسیر زندانم بودی جرمیم کی خوش سخنرانم
هر کسین نطقی وار فصاحتی وار قلم آتشینی قدرتی وار
گرک السون همیشه زندانی چخا زنداندا عاقبت جانی
ای کریمی ندور بو طول کلام مجلسی لنگه ورما ایله تمام
«کریمی»
برچسبها: شعر کریمی, شعر ترکی
